பாடல் 63 ... தியங்காப் பொறிய   (நரக வேதனை என்பது உண்மையே)

......... பாடல் .........

      தியங்காப் பொறியுண் டெனுந்தனுத் தீதலு மேதியையூர்
      தியங்காப் பொறியுண் டவமிலி யேயென்று செப்பலுஞ்சத்
      தியங்காப் பொறியுண் டயன்கைப் படாது திரவெற்புநி
      தியங்காப் பொறியுண்டை பண்டுயப் போர்செய்த சேவகனே ...... 63

......... சொற்பிரிவு .........

தியங்கா பொறியுண்டு எனும் தனு தீதலும் மேதியை

(ஊர்) தி அங்கா பொறி உண் தவமிலியே என்று செப்பலும்

(சத்) தியம் கா பொறியுண்டு அயன் கைப்பாடாது திர வெற்பு

(நி) தியம் கா பொறியுண்டை பண்டு உய போர் செய்த சேவகனே.

......... பதவுரை .........

நிதியம் ... சங்க நிதி பதும நிதி இவைகளும்,

கா ... கற்பக விருட்சமும் ஆக விளங்கும்,

பொறியுண்டை ... செல்வத்தினை உடைய பொன்னுலகு,

பண்டு உய்ய ... முன்பு அழியாமல் பிழைக்கும்படி,

திர வெற்பு ... நிலை பெற்ற கிரவுஞ்ச கிரியை,

போர் செய்த ... போரில் வென்று அழித்த,

சேவகனே ... முழு வீரனே,

தியாங்கா ... சற்றும் கலக்கமில்லாத,

பொறி உண்டு எனும் ... ஐம்புலங்களை உடைய,

தனு ... இந்த தேகம்,

தீதலும் ... அந்திம காலத்தில் அக்கினியில் வெந்து போவதும்,

மேதியை ஊர்தி ... எருமை வாகனமுடைய எமதூதன் (என்னை எமபுரத்திற்கு கொண்டு சென்று)

அங்கா ... வாயைத் திற,

தவமிலியே ... சற்றும் தவம் செய்யாத பாவியே,

பொறி உண் ... (கருணை இல்லாமல் பிராணிகளை கொன்று சாப்பிட்ட பாவத்திற்காக) தீப்பொறிகளைச் சாப்பிடு,

என்று சொல்லும் ... என்று கூறப்போவது,

சத்தியம் ... உண்மை ஆதலால்,

பொறியுண்டு ... பிரம லிபி என் தலையில் எழுதப்பட்டு,

அயன் கை படாது ... பிரம்மன் என்னை மீண்டும் சிரிஷ்டிக்காதபடி

கா ... என்னைக் காத்தருள வேண்டும்.

......... பொழிப்புரை .........

கிரவுஞ்சத்தை அழித்து அமராவதியை காத்த காவலனே, ஐம்பொறிகளுடன் கூடிய இந்தத் தேகம் சாம்பலாவதும், செய்த பாவத்திற்கு தக்கபடி பல விதமான தண்டனைகளை நரகத்தில் அடைவது சத்தியமாதலால் இனிமேலாவது இப்பிறவியை நீக்கி என்னைக் காக்க வேண்டும்.