பாடல் 37 ... சீர்க்கை வன   (பக்தி செலுத்துதல்)

......... பாடல் .........

      சீர்க்கை வனப்பு மலர்வேங்கை யானவன் செஞ்சிலையோர்
      சீர்க்கை வனப்பு னிதத்தவ வேடன் றினைவளைக்குஞ்
      சீர்க்கை வனப்பு னமதுருக் காட்டிய சேய்தமிழ்நூற்
      சீர்க்கை வனப்பு னிமிர்சடை யோன்மகன் சிற்றடிக்கே ...... 37

......... சொற்பிரிவு .........

சீர்க்கை வனப்பு, மலர் வேங்கையானவன், செஞ்சிலையோர்

சீர் கை வன புனித தவ வேடன், தினை வளைக்கும்

சீர்க்கு ஐவன புனமது உருக்காட்டிய சேய், தமிழ் நூல்

சீர்க்கு ஐ, வன புல் நிமிர் சடையோன் மகன், சிற்றடிக்கே.

......... பதவுரை .........

சீர்க்கை ... மனம் திருந்துதல்,

வனப்பு ... அழகாகும்,

மலர் ... புஷ்பங்கள் உள்ள,

வேங்கையானவன் ... வேங்கை மரமாக நின்றவனும்,

செஞ்சிலையோர் ... சிறந்த வில்லை உடைய குறவர் கூட்டத்தினர்,

சீர் ... சந்தேகப்பட்ட தன்மையை,

கை ... கோபித்து,

வன ... அந்தக் காட்டில்,

புனித தவ வேடன் ... தூய சன்னியாசி ரூபம் எடுத்தவனும்,

தினை வளைக்கும் ... தினைப் பயிரைக் காவல் காத்து வந்த,

சீர்க்கு ... சிறந்த வள்ளிக்கு,

ஐ வன புனமது ... மலை அரிசி (தினை அரிசி) விளையும் அந்த வயலில்,

உருக்காட்டிய ... தன்னுடைய உண்மை சொரூபத்தைக் காட்டிய,

சேய் ... குமாரக் கடவுளும்,

தமிழ் நூல் சீர்க்கு ... தமிழ் இலக்கியத்தில் காணப்படும் 30 சீர்க்கும்,

ஐ ... தலைவனாக (ஞானசம்பந்தராக) அவதரித்தவனும்,

வன ... கங்கா ஜலமும்,

புல் ... அறுகம்புல்லும்,

நிமிர் ... விளங்கும் நீண்ட,

சடையோன் மகன் ... ஜடாபாரத்தை உடைய சிவகுமாரனாகிய முருகனின்,

சிற்றடிக்கே ... சிறிய திருவடிகளுக்கு

(சீர்க்கை வனப்பு)

......... பொழிப்புரை .........

வள்ளிமலையில் வேங்கை மரமாக மாறினவனும், தவத்துறவி வேடத்தில் வந்தவனும், கடைசியில் வள்ளிக்கு தன் சுய ரூபத்தைக் காட்டினவனும், செந்தமிழ்க் கடவுளும், கங்காதரனாகிய ஈசனின் மகனிடம் பக்தி செலுத்துதல் நமக்கு அழகாகும்.